أكرم حسني يدافع عن المخرج محمد سامي في «الأوضة الضلمة»
نفى الفنان أكرم حسني تدخل المخرج محمد سامي في سيناريو فيلم "الأوضة الضلمة" الصغيرة.
وكتب "أكرم" عبر صفحته على فيسبوك: "رجاء من السادة الصحفيين المحترمين قبل ما ينشروا أي أخبار يحاولوا يتحروا الدقة قبل ما ينشروا .. للأسف انتشرت مؤخرا أخبار غير صحيحة تماما عن فيلم #الأوضة_الضلمة_الصغيرة بتقول إن أكتر من سيناريست رفض يشتغل على سيناريو الفيلم بسبب تدخلات المخرج محمد سامي وده محصلش بأي شكل من الأشكال".
وتابع: "أولا محمد سامي مخرج كبير ومحترم وأعماله هي اللي بتتكلم عنه وراجل بيحب شغله وبيهتم بكل تفاصيله ده غير إن فكرة الفيلم فكرته ف بطبيعة الحال لازم يقعد مع السيناريست عشان يشرح له تفاصيل الفيلم والشخصيات وده في صميم شغله كمخرج".
واضاف "ثانيا تم ترشيح السيناريست هشام هلال من المنتج وليد منصور و هشام قعد معانا و سامي شرح له الفكرة و كنا بنقعد جلسات عمل كان سامي بيتعامل فيها بمنتهي الاحترام و الاحترافية و دي حاجة انا اشهد عليها".
وتابع "ثالثا لما اختلفنا مع هشام هلال ( كسيناريست ) لاني علي المستوي الشخصي مشفتش منه اي حاجة وحشة اعتذرنا له بمنتهي الذوق و الاحترام من خلال المنتج و سامي رشح السينارست المحترم كريم حسن بشير اللي خلص لنا السيناريو في زمن قياسي و بمنتهي الاحترافية".
واختتم كلامه "رابعا و اخيرا الشغل ده رزق و مش مفروض ابدا لما نختلف فيه نتكلم عن بعض وحش و ندعي حاجات محصلتش.. انا بقول الكلام ده احقاقا للحق و عشان تبقي الصورة واضحة قدام السادة الصحفيين عشان تبقي قدامهم الصورة كاملة .. دعواتكم لينا عشان نقدم لكم عمل يليق بيكم و يحترم دماغكم و يسعدكم لاننا بنعمل شغلنا بمنتهي الحب و اسف للاطالة".