اخلاء سبيل مصطفي يونس بضمان محل أقامته ورسالة الي الخطيب ومجلس الإدارة
وجه مصطفى يونس، نجم النادي الأهلي السابق، رسائل لـ مجلس إدارة النادي الأهلي برئاسة محمود الخطيب، وجمهور المارد الأحمر في أعقاب أزمته الأخيرة مع النادي.
وكانت جهات التحقيق بالنزهة، قررت إخلاء سبيل مصطفى يونس، في بلاغ محمود الخطيب ومجلس إدارة النادي بسبب تصريحاته المسيئة بضمان محل إقامته.
وقال مصطفى يونس في فيديو بثه عبر قناته الرسمية على يوتيوب: «إلى شعب مصر العظيم وجمهور النادي الأهلي اللي صنع تاريخ مصطفى يونس، أنا الحقيقة بقالي كتير قوي ما بتكلمش والتزمت بكل حاجة اتقالتي، وبعدين بيطلع كلام باسمي لم ولن يحدث في أي وقت من الأوقات».
وأضاف: «أنا عمري ما هبقى زملكاوي، لإني عاشق لتراب النادي الأهلي، وهناك ناس بتسيء ليا على أساس أن أنا في خلاف مع النادي الأهلي، ولكن القلعة الحمراء دي حياتي، وإذا كان هناك خلاف فالخلاف مابين اخوات، والخطيب بالنسبالي أنا، وكل الاخوات والأهل بينتخانقوا أو بيزعلوا ده شيء طبيعي، ولكن يبقى الخطيب في القلب».
وتابع: «الخطيب بالنسبالي مش زميل، ولكن ده أخويا وهو في القلب، وأي حد بيحاول يوقع بينا مش هيعرف، لإني مقدرش استغنى عنه».
وأوضح: «يوم ما الخطيب قال إنه عيان في المستشفى أنا فضلت أبكي كإن أبويا وأمي ماتوا مع بعض»، مشيرًا إلى الخطيب أخذ عزاء والدته عندما كان يونس في مهمة بـ السودان.
وأكد مصطفى يونس: «اللي بيشكك في أهلاويتي، أنا دايمًا بقول إن اتنين بيفرحوني في مصر وهما الأهلي ومحمد صلاح».