أسامة كمال يوضح جملة السيسي لكامل الوزير «هو أحنا في الجيش بنتحايل على حد؟»

حلل الإعلامي اسامة كمال مقدم برنامج مساء DMC، جملة الرئيس السيسي للفريق كامل الوزير وزير النقل وهي "يا كامل.. هو إحنا فى الجيش بنتحايل على حد؟ دى جملة الرئيس فى يوم الشهيد للمهندس كامل الوزير، اللى رد بالتحية العسكرية مش بالكلام".

وقال كمال عبر فضائية DMC، اليوم الثلاثاء، "جملة الرئيس حقيقية ولازم تكون متطبقة في كل الوزارات والهيئات، والموضوع مش اختياري، انت هتعمل كذا، يبقى هتعمل كذا، وهتعمله زي الفل، الانضباط مدرسة القوات المسلحة، لكن مافيش حاجة بتقول القوات المسلحة فقط".

وتابع "علوم الإدارة كلها بتقول الكل ينفذ اللي وراه أو يروح، ويروح دي في الدولة اللي مش موجودة عندنا، اللي ما ينفذش مايروحش، لأ، يتحاكم كمان.. هو معنى انضباط الجيش يبقى سبهللة القطاع المدني؟".

وأشار كمال إلى أن تكريم المقاتل كامل الوزير من قائده الأعلى على الملأ وقدام الكاميرات على الهواء مباشرة، ظهر فيه تقدير كبير لشخص وآداء ضابط بذل كل جهده فى خدمة بلده، والتكريم كان بداية لمرحلة جديدة فى مسئولية أكبر، برجالة مش من مدرسة العسكرية، في موقع عجز محترفين كتير يفكوا طلاسمه".