هنا الزاهد تنشر آخر صورها مع الراحل طلعت زكريا

ودّعت الفنانة هنا الزاهد الفنان طلعت زكريا، الذى رحل عن عالمنا ظهر أمس الثلاثاء، بعد صراع مع المرض عن عمر 59 عاما، حيث تعتبره هنا بمثابة والدها؛ لأنه من رباها هى وشقيقتيها فرح ونور، خاصة أن طلعت زكريا كان متزوجا من والدتهن شيرين المنزلاوى قبل انفصالهما منذ عدة أشهر.

هنا الزاهد نشرت آخر صورة جمعتها بالراحل طلعت زكريا من عقد قرانها على النجم أحمد فهمى، وعلقت على الصورة: "دى آخر صورة اتصورتها فى كتب كتابى مع أبويا وحبيبى و سندي اللى كبرت معاه سنين.. أنا فتحة الصورة دى من بدرى وعايزة أقولك انك ربنا هيدخلك الجنة يا أطيب خلق الله انت ربيت 3 بنات وكأنك أبوهم وأكتر".

وأضافت هنا الزاهد: "أنا عايزة أقولك إني معرفتش كلمة بابا غير وأنا معاك عمري مقولت اصلا تقريبا بابا غير ليك. كنت بجري عليك اول معمل حاجة غلط عشان تدافع عني قدام ماما.. فكرة أول بيض أومليت وقولتلي اعملي مطعم " بالهنا و الشفاه" وأديتني 100 جنيه عشان تشجعني اطبخ.. كنت دايما تقولي انت هتبقى حاجة كبيرة و كنت بتشجعني".

وتابعت: "كنت فخور بيا لما اتخرجت وعيط اليوم ده. انا عمري محسيت انك مش ابويا اللي مخلفني.. انا مش مصدقة اني مش هشوفك تاني و اقولك زازي يا زازي.. نفسي ترجع واقولك قد ايه احنا بنحبك كلنا واقولك انك اعظم ممثل. انا بحبك اوي و مكنتش اعرف اني بحبك اوي كده..هتوحشني يا احن انسان عرفته في حياتي..ارجو الدعا".

يذكر أنه تم تشييع جثمان الفنان طلعت زكريا بعد صلاة ظهر اليوم الأربعاء بمسقط رأسه بمحافظة الإسكندرية، حيث تمت صلاة الجنازة عليه بمسجد العمرى بمنطقة العطارين.