صاحبة صورة ربط والدها لحذائها تكشف التفاصيل.. فيديو

كشفت سارة أحمد صالح، طالبة الثانوية العامة، والتي انتشرت صورتها خلال قيام والدها بربط حذائها عقب خروحها من الامتحان، تفاصيل الواقعة.

وقالت خلال مداخلة هاتفية مع الإعلامية بسمة وهبة، على فضائية اون اي، "إن بابا متعود دايما يجي معايا الامتحانات ويستناني أمام اللجنة ليطمئن عليا بعد كل امتحان عملت ايه، والسنة دي بسبب الظروف حاول يقنعني لتأجيل الامتحانات لخوفه عليا ولكن أنا رفضت، وصمم ينزل معايا الامتحانات السنة دي كمان".

وتابعت: "كنت تعبانة في الامتحانات السنة دي بسبب الكمامه والخنقة والحر، قبل ما ادخل شايفني تعبانه شويه قالي انه يمشي ولا يستنى قولتله لا انت تمشي عشان متتعبش وعشان غلط أولياء الأمور يستنوا خارج المدرسة".

وأضافت سارة: عقب انتهاء اللجنة خرجت لقيته واقف برا، وكنت خارجة من الامتحان متبهدله خالص من الحر والامتحان 3 ساعات وبندخل المدرسة من الساعة 8 يعني 5 ساعات، وخرجت ومكنتش متوقعه انه واقف أمام المدرسة، ولقيته قعد 5 ساعات".

وأضافت: "بابا اول لما شافني جبلي مياه وقالي نرتاح شوية وشاف الرباط مش مربوط صمم يربطه لي، انا مكنتش موافقة لكن هو صمم يعمل ده وقتها عشان يخفف عني توتر الامتحانات واللي بيحصل، ووقتها حد صورنا".