توك شو الثلاثاء، 17 نوفمبر 2020 09:29 مـ بتوقيت القاهرة

استشهد في حريق بالمترو.. كلمات فخر وحزن من أسرة اللواء ياسر عصر

قالت زوجة الشهيد اللواء ياسر عصر، شهيد المترو: "كان المفروض أنه بيجي إجازة يوم الخميس والجمعة وبيمشي السبت الصبح وبيرجع يوم الأحد، بس هو عمره ما كان بيتأخر على أنه يؤدي واجبه لآخر وقت".

وأضافت زوجة شهيد المترو، خلال لقائها بفضائية "TeN"، اليوم الثلاثاء: "المفروض أنه كان جاي أمس الإثنين وكلمته قبل الحادثة بوقت بسيط، قولتله أنت جاي، فقالي إن شاء الله مش عارف الله أعلم جاي ولا مش جاي، تقريبا كان حاسس".

وتابعت: "بعد شوية حسيت أنه فيه حاجه ف رجعت اتصلت بيه لاقيت تليفونه مقفول فقولت أكيد فيه مشكلة وهو مش فاضي يرد عليا، وبعد كده التليفون اتفتح وفضلت اتصل بيه مش بيرد، وبعد كده لاقيت ابني نازل وبيقولي أن باباه تعبان وفي المستشفى، فاتصلت بأخو زوجي ف لاقيته هناك في المستشفى معاه، وهما ناس متماسكين جدا ولما بيكون فيه حاجه مش بيخلوا الستات يروحوا في حتة".

وأردفت: "ولما وصلت المستشفى قالولي البقاء لله، وهو كان بيؤدي واجبه لآخر وقت خاصة لما عرف بحريق محطة مسرة، ولما ينتظر مجيء الحماية المدنية وقام بإطفاء الحريق بنفسه".

بينما قالت نجلة الشهيد ياسر عصر: "أنا كنت نايمة وصحيت لاقيت مامتي بتكلم أخويا زياد، وبيقولها أن بابا تعبان، وبعد كده ماما كلمت حد من اعمامي عشان يكون مع بابا ، وفعلا لاقينا حد منهم هناك، أنا دايما فخورة بيه سواء كان شهيد أو لأ، لأنه مكنش بيحاول يرمي شغله على ناس تانية لحد النهاية".