محمد رحيم يعلق على أزمة المخرج محمد سامي

علق الملحن محمد رحيم، على أزمة المخرج محمد سامي بعد قرار الشركة المتحدة بإيقاف التعامل معه كمخرج ومؤلف.
وقال "رحيم" عبر حسابه على موقع التواصل الاجتماعي "فيس بوك": "مشكله الشهره انها بتصنع هاله كبيره للفنان ومع تكرار نجاحه الهاله دي بتكبر أكتر وبتخلى الناس تتخيل صوره مختلفه عن الواقع علشان كده انا حابب اتكلم عن واحد من اعز أصدقائي وهو المخرج محمد سامي اللى بجد مهما حكيت عن بساطته وطيبته في ناس ممكن ما تتخيلش الرجل اللى كان ممكن يعدي عليه الساعه 3 بالليل علشان يسمع جمله لحن ويفضل فرحان بيها وبيدندنها بصوته الوحش أكتر من نجوم كتير مطربين".
وتابع "رحيم:" هو عاشق للسينما والدراما والموسيقى وعنده رؤيه فنيه لايستهان بها وهو احد المخرجين المصريين الشباب اللى بجد عملوا نقله نوعيه في الدراما المصرية، وسامي مش بس البرنس والاسطوره لأ طبعا! سامي هو أول من تصدى في جيله لغزو الدراما التركيه للبيوت العربيه وقدم الصوره المصرية بمواصفات تحاكي العالميه في أول تعاوناته مع الفنانه غاده عبد الرازق مسلسل (مع سبق الاصرار )وساعتها قدمنا أغنية (جربت) بصوت النجمه اليسا طبعا وحققنا نجاح كبير وكان أول مره يستخدم تكنيك الرسم بالرمال في تتر مسلسل خارج الشكل النمطي والسنه اللى بعدها حقق قفزه تانيه مع غاده في مسلسل (حكايه حياه) قفزه أكدت ان النجاح الاول مكانش صدفه وقدم صوره أكثر ابهارا وهو اللى اختار أغنية (مشاعر) من الحاني اللى هي النهارده أكبر تيتر عربي حقق مشاهده على مستوى كل الدراما المصرية والعربيه (220 مليون) نسبه مشاهده وده غير انها اترجمت ل أكتر من 10 لغات وكمان خلت مطربين كتير اجانب يغنوها بالعربي وده غير تتر النهايه بخاف من الغروب بصوتي وكلمات الخال عبد الرحمن الابنودي واللى كمان حقق نجاح كبير".
وأضاف محمد رحيم":"وبعد نجاح أعماله انطلق انطلاقه كبيره وطبعا كان لازم يتنوع ويكبر حجم تجربته وقدم أعمال كلها مختلفه وناجحه لأنه موهوب ودؤوب ومجنون وحقق رصيد كبير في وقت قليل".

واختتم رحيم حديثه وقال:"في النهايه كل إنسان بيخطئ ويصيب كل إنسان بيتعلم حاجه جديدة كل يوم وأكيد محمد اتعلم كتير الفتره اللى فاتت والحياه تجارب أتمنى من قلبي أن مشكلته تتحل ويرجع تاني لمكانه الطبيعي يقدم أعمال ناجحه ومتميزه لأنه عبقري وياريت بس مينساش ياخد دروس فوكاليز علشان بجد صوته وحش أوي".