عمرو أديب يطالب بخفض أسعار الزيوت: الناس دفعت كتير بسبب الغلاء
استنكر الإعلامي عمرو أديب، استمرار ارتفاع أسعار الزيوت والأرز محليًا رغم انخفاض أسعارها عالميًا، قائلًا إن التجار لا يسعدون بهذا الحديث.
وأضاف خلال تقديمه لبرنامج «الحكاية»، عبر فضائية «MBCمصر»، مساء السبت: «معقولة طن الزيت ينزل لـ50 ألف جنيه، ومفيش مساء الخير 2 جنيه أو 5 جنيه ينزلوا، رغم إن سعر الزجاجة المفروض ينزل 15 جنيها».
ولفت إلى ارتفاع أسعار الدواجن والبيض مرة أخرى، رغم حل الأزمة خلال الفترة الماضية، معقبًا: «مش قلت لنا خلاص والبيضة هتفضل أجمل حاجة في الدنيا، أنا مش هتكلم عن اللحمة، دي برا الكلام وخارج عن كل المواثيق وبلاها لحمة، لكن باقي الحاجة ليه الأسعار في مصر مش بتنزل؟؟».
وشدد على أهمية انخفاض زجاجة الزيت لسعر يقترب إلى السعر المدعوم من الدولة، مستطردًا: «يا جماعة لازم يكون في كلمة تقيلة مع الناس، ماشي فهمت وقدرت وشايفك ومشاكلك وكل حاجة، طب الناس ذنبها إيه؟ دفعت كتير عشان الغلاء، ولما السعر ينزل الناس دي مش المفروض يتعمل لها حاجة!».
وأشار إلى أن التجار تعاملوا في الفترة الماضية على أساس العرض والطلب وسعر الدولار خارج البنك المركزي، مناشدًا أعضاء مجلس النواب التدخل لحل الأزمة، عبر الحديث مع التجار في دوائرهم، أو عقد جلسات مع وزيري التموين والمالية.
وأكمل: «عارف إن التجار بيكرهوني، أنت اتفقت معايا على اتفاق يعلى برا يعلى جوا، وينخفض برا وينخفض جوا، مش ده الاتفاق الظالم من الأول نكمله على ظلمه، من حق المواطن إن السعر ينزل ولازم ينزل».
