داليا إبراهيم: أنا معتزلتش الفن ولكن جالي اكتئاب.. وعالجته بالبعد

أكدت الفنانة داليا إبراهيم عدم اعتزالها الفن، ولكنها أُصيبت بالاكتئاب مما دفعها للابتعاد عن الوسط الفني منذ 10 سنوات.

وقالت داليا إبراهيم خلال حوارها مع الإعلامية مروة صبري، في برنامجها “قعدة ستات” المذاع عبر شاشة قناة “القاهرة اليوم”: أنا معتزلتش الفن، أنا قعدت في البيت من 10 سنين وبعدت عن الوسط خالص، مش عارفة إيه اللي حصل ولكن جالي اكتئاب، وعالجت ده بالبعد عن الوسط الفني ودوشة الشهرة، وقولت ده يمكن حل من الحلول ولقيتني بتاخد، واشتغلت في حاجات تانية وقولت يمكن أعرف اشتغل في حاجة تانية غير الفن ومجهوده يكون أقل شوية، لقيتني مش مبسوطة، الفن برضو حاجة جميلة.

وتابعت: أنا مبعدتش عن الفن تمامًا ولكني كتبت سيناريوهات لما لقيت نفسي مش عارفة أطلع طاقة حبي للفن في إيه، وكتبت روايات وهو ده اللي شدني.

وعن سبب إصابتها بالاكتئاب، فعلقت داليا إبراهيم قائلة: استعانت بدكاترة وأدوية علشان اتعالج من الاكتئاب، ومجاليش اكتئاب بسبب الوسط الفني ولا جالي إحباط، بالعكس أنا كنت في عز شغلي، لأ دي حاجة في كيمياء المخ ولكن مش كهرباء في المخ، ودي حاجة جاتلي واتعالجت منها.

وأضافت: وقت ما جالي اكتئاب كنت بشتغل في مسلسل وهو متعرضش لغاية دلوقتي، وحصل مشكلة ولكن قولت عادي، ومش ده سبب الاكتئاب.

https://youtu.be/bllO0YTcf7o?si=Bo-Tbmdxdca6nJxj