المطرب فارس: الفن أثر على حياتي الشخصية وكرهته.. وفي ناس مبتحبش تشوفني

تحدث المطرب فارس، عن فترة ابعتاده عن الوسط الفني لأكثر من 15 عام، موضحًا أن الإمكانيات الفنية أصبحت مختلفة بالوقت الحالي كما أن هناك فنانيين يشترون مشاهدات أغانيهم عبر يوتيوب.

وقال فارس، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": بعدي عن الوسط الفني كانت غلطة لأني كنت في قمة نجاحي ساعتها، وحسيت أن الفن عملي مشكلة في منطقة معينة في حياتي الشخصية وكرهت الشهرة خالص وبعدت، ومكنش عندي ثروة زي ما بيتقال وأنا عمري ما بصيت للناحية المادية، ودايمًا ببقى عايز أعيش كويس.

وتابع: كل أصحابي قالولي ارجع تاني للفن، ولكن ساعاتها الموضوع طلع من قلبي شوية، وقدر الله وماشاء فعل، وفي ناس ميحبوش يشوفوني لأني بفكرهم بأيام مش حلوة بالنسبة لهم، لكن في ناس كويسين كتير.

أما عن تفاصيل عودته من جديد، فعلق فارس: الشاعر وائل توفيق كان أكتر واحد بيزن عليا علشان أرجع للفن وأغني أغنية عصبي بتاعته وكان بيجيلي كل يوم، وغنيت الأغنية ولكن فوجئت أنها متباعة قبل كده واتشالت، ودي برضوا أثرت عليا وقولت شكلها معرقبة، وأنا غلطان أنا غنيت لحن متباع والمنتج عنده حق، والملحن هو اللي غلطان.

وأضاف: الإمكانيات دلوقتي اختلفت أوي ومش لازم الأغنية تكون حلوة، في أغاني كتير ناجحة وعاملة مشاهدة وهي مش حلوة، وزمان كان الواحد بيختار اللي هو عايز لكن دلوقتي بيتفرض عليه، ومش كفاية أن الأغنية تكون حلوة وأن المطرب صوته حلو، المهم أن يعمل لها دعاية جامدة جدًا.

وأردف: في فنانيين بيشتروا المشاهدات، إزاي أغنية نازلة بقالها ساعة تعمل مليون؟ بيلعبوا على نفسية المتلقي، دول لو قاعدين مستنيين في اليوتيوب مش هيجيب مليون في ساعة، وحتة التواجد دي مهمة جدًا.

واستطرد: الفن ده بيعبر عن ثقافة الشعوب وذوقها وانسجامها، والمطرب مهما كان شكله له جمهور، والراب قديم جدًا وأنا بسمع من زمان ودلوقتي في كويسين وفي أغنية عجباني لويجز، والراب له جمهور والتنوع حلو.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

https://youtu.be/VuXKd7OontY?si=B_aoUX_-z5jXrNoM