سعد فتحي: محمد إمام بيقف أول ما بدخل اللوكيشن.. وأين أنا من المسلسلات؟

تحدث الفنان سعد فتحي، عن قلة أعماله الفنية خلال الفترة الأخيرة، وصغر مساحات دوره بالأعمال الفنية، مؤكدًا أنه يمتلك جميع مقومات الفنان.

وقال سعد فتحي، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": أنا مش عارف ليه مساحة أدواري صغيرة، يعني الناس دي عارفني ولما بيعملوا إعلان في التليفزيون على ينجح بيجيبوا المشاهد بتاعتي، أنا مش عايز أشكر في نفسي وأقول مميز، ليه ميكونش في مساحات أكبر والمنتجين أنا مش عارف، وأنا راضي ويكفي أن أي فيلم بيتعلم بالمشاهد بتاعتي.

وتابع: أنا اشتغلت مع نجوم مصر كلهم وهما في البدايات، وكلهم عارفني كويس، وأنا معنديش فكرة أني أروح لحد أقوله على شغل دي تقيلة عليا وأنا مبقتش زي الأول، ومفيش حد على مستوى العالم العربي ميعرفنيش، حتى لو مش عارفني أسمًا عارفني شكلًا.

وأضاف: أنا مش عارف ليه مش عايزين يشغلوني، مش عايز أقول أنا اتظلمت ولكن أين أنا من المسلسلات، يعني النهاردة في كام مسلسل في رمضان أنا مش في ولا واحد فيهم؟، أنا بسألهم أهو أين أنتم مني؟ والحمد لله مفيش حاجة عملتها حتى لو مشهد صغير مخدتش حقها، ويمكن اللي بيضايقهم أن المشهد هو اللي بيعلم في الفيلم.

واستكمل: الفن قائم على الشلالية والعلاقات، وإحنا جيل مبيعرفش يفرض نفسه ويكون فيه طبع التباتة والغلاسة ويروح يتكلم ويفرض نفسه، النهاردة لو دخلنا أي لوكيشن هنلاقي 3 معروفين في الوسط والباقي مش معروفين، ولو سألنا يقولك ده أخو وقريب فلان، ومبيحترموش الجيل القديم.

وأضاف: محمد إمام كان أول ما أدخل اللوكيشن بيقف ويديني كرسي، هو نجم وبطل لكن فاهم ومتربي، لكن أين أنا من الناس التانية؟، وعايز أقول أني موجود وصحيًا وفنيًا كويس، ومعروف على مستوى العالم العربي كله، ناقصني إيه؟ اللي ناقصني أن المنتجين ياخدوا بالهم مني.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

https://youtu.be/8Hj-clo-Zjg?si=DEvg8SF1wz7ImtAH