سلمى غريب: محمد هنيدي اعتذر عن فرحان ملازم آدم.. ومسلسل أعلى نسبة مشاهدة بيمثل الواقع بتاعنا

تحدثت الفنانة سلمى غريب، عن كتابة الأعمال الدرامية في الوقت الحالي، بجانب كشف كواليس فيلم فرحان ملازم آدم، موضحة أنه كُتب في الأساس للفنان محمد هنيدي.

وقالت سلمى غريب، في لقائها مع الإعلامية إنجي هشام، في برنامج "المنسي" المذاع عبر شاشة قناة "هي": الكتابة اتغيرت دلوقتي، وبقى نادر أنك تشوفي مؤلف واحد للعمل، إنما في حاجات حلوة، يعني أنا متابعة من قبل رمضان بيوم 6 مسلسلات أكترهم حلو، ومسلسل أعلى نسبة مشاهدة بيجسد الواقع بتاعنا دلوقتي.

وتابعت: دلوقتي اللي بنتفرج عليه هو هو في كل الأعمال، زمان كان شركة الإنتاج تبعتلي الدور ألاقي عاملة زيه أو مش عاجبني أرفض، وعمر ما حد زعل مني، ودلوقتي لو حد عايزني ضيفة شرف واعتذرت بيتقال ممنوع تدخل هنا تاني، إزاي؟ أنا بتعامل مع حاجة بحبها واللي حاطط نفسه في الشركة دي لما بيروح له مليون مؤلف وهو بيرميهم وياخد منهم 3 عاجبينه حد بيقوله أنت إزاي تعمل كده؟ لأ ده حقه يدور على اللي هو عايزه، وأنا كمان حقي كممثلة أدور على اللي أنا عايزاه.

وأضافت: أنا كممثلة اتخرجت سنة 1993 وعملت أعمال كتير مع ناس جامدة جدًا، أنا اشتغلت مع نجوم مصر، وأجمل حاجة في حياتي أني بدأت مع كبار النجوم، أني من حقي أقول لأ، أنتي قوليلي أتعلم إيه من الجيل الجديد اللي عنده فولورز؟.

وعن كواليس فيلم فرحان ملازم آدم، فقالت سلمى غريب: أنا مش ندمانة على دوري في فيلم فرحان ملازم آدم، والفيلم ده كان مكتوب لـ محمد هنيدي وهنيدي رفض، وبعدين الأستاذ مطيع زايد بعتلي وأنا كنت فاكرة أنه مسلسل وفجأة قالي أنه فيلم، وأنا كنت أول ما اشتغلت سينما كرهتها لأنها بتاخد وقت كبير، ولكن لما اشتغلت مع الأستاذ عمر عبد العزيز في الفيلم ده حبيت السينما، وقولت مش هعمل حاجة أقل من دي.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

https://www.youtube.com/watch?v=lEw7Ed1JxcY