دنيا المصري لـ يارا أحمد: نظرة المجتمع لـ المطلقات اتغيرت.. وهما من أكتر الستات الناجحين وشايلين عن الرجالة

أوضحت الفنانة دنيا المصري، أن نظرة المجتمع لـ المرأة المطلقة تغيرت عن ذي قبل، مؤكدة أن السيدة المطلقة من أكثر السيدات اللاتي حققن نجاحًا على المستوى العملي، بجانب حديثها عن ابنتها وزوجها.

وقالت دنيا المصري، خلال حوارها مع الإعلامية يارا أحمد، في برنامج نجمك مع يارا، المذاع عبر شاشة قناة “هي”: نظرة المجتمع دلوقتي للست المطلقة اتغيرت، وفي ستات كتير مطلقات بشتغلوا ومحققين نجاح، الست دلوقتي تقدر تعمل كل حاجة، والراجل من غير الست ولا حاجة والست من غير الراجل ولا حاجة، الاتنين لازم يكملوا بعض لو في تفاهم، ولكن الست المطلقة تقدر تعمل كل حاجة وهما من أكتر الستات الناجحة.

وتابعت: الستات كلها ضاغطة نفسها حتى أنا، ودي طبيعة الحياة الدنيا دلوقتي صعبة جدًا ومطلوب منك تعملي كل حاجة لولادك وجوزك وتشتغلي وتنجحي، الست شايلة كتير أوي لو جيتي حسبتي الحاجات اللي الست بتعملها هتطلع أكتر من اللي الراجل بيعمله وناجحة فيها.

وعن علاقتها بـ ابنتها، فعلقت دنيا المصري: علاقتي بـ بنتي علاقة غريبة جدًا، أنا عايشة وبنجح علشان هي في حياتي، عايزة أنجح وأطلع بشكل كويس علشان حياة فريدة، هي بنتي وأختي وصاحبتي وربنا يخليها ليا، أنا بعرف أوفق بين الشغل وبنتي لأن هي مالهاش ذنب هي كل حاجة في حياتي.

كما كشفت دنيا المصري، عن رأيها في دخول ابنتها مجال الفن: أنا معنديش مشكلة أنها تطلع ممثلة ولكن تركز في حياتها الأول، بعد كده تختار اللي هي عايزاه دفن، وطبعًا عندها ميول للفن، وهي فنانة وبترسم حلو أوي.

أما عن سبب عدم ظهورها مع زوجها بـ استمرار بمواقع السوشيال ميديا، فعلقت دنيا المصري: هو مبيحبش يبقى متواجد كتير ومبحبيش السوشيال ميديا، بس هو ماشاء الله عليه مونتير شاطر.

كما تحدثت دنيا المصري، عن مشاركتها في مسلسل بيت الرفاعي بطولة الفنان أمير كرارة، في رمضان 2024، قائلة: شخصيتي في مسلسل بيت الرفاعي، استفزتني جدًا لأنها عكسي تمامًا، واتبسطت جدًا بالشغل مع أستاذ أحمد نادر جلال هو مريح في الشغل أوي، وأستاذ أمير كرارة طبعًا الكواليس بتاعته حلوة جدًا.

يذكر أن برنامج نجمك مع يارا يعرض يوم أربعاء من كل أسبوع وإعادة يوم الخميس في الساعة 1 بعد منتصف الليل، والبرنامج من إعداد مروة محمد ورانيا عبد اللطيف، على شاشة قناة هي.

https://youtu.be/uqf3l9uU-6M?si=PXIUGj58fXBs_AH_