رانيا محمود ياسين لـ أوضة ضلمة: هنا الزاهد بتفكرني بنفسي وأنا صغيرة

قالت الفنانة رانيا محمود ياسين، إنها معجبة بأداء الفنانة هنا الزاهد ومسلسلها الأخير إقامة جبرية الذي عرض قبل شهر رمضان الحالي.

وتابعت رانيا خلال لقائها ببرنامج “أوضة ضلمة” الذي تقدمه الإعلامية إنجي هشام على شاشة “هي”: أنا مبغيرش من حد في الوسط الفني، وأنا بحب هنا الزاهد بتفكرني بيا وأنا ممثلة صغيرة، وعجبني تمثيلها لما عملت إقامة جبرية أنا اتفاجئت بيها.. نفسي أعمل دور كده.

واستكملت رانيا حديثها: اللي غار مني كتيير في جيلي وأكبر - كنت بتفاجئ من الغيرة- وكنت بتعامل مع الناس كلها ولا ببص على حد ده شكله عامل ازاي ولا اغير منه، مبقلقش من الممثل القوي ببقى عايزة ابقى زيه.

كما علقت رانيا محمود ياسين على تعرض الفنانين باستمرار لانتقادات: الفنان المصري الوحيد اللي مستهدف بالشتيمة على السوشيال ميديا- الدول العربية التانية مبيحصلش كده..طول الوقت اهانات وحسبي الله ونعم الوكيل فيكم،، ده لو فنان غلط غلطة بيتشتم اكتر من نتنياهو وترامب، لا بيفكروا انه ممكن يعيا او ينام ميقومش او عنده ولاد او ميعدوش انه غلط غلطة او ذلة.

وكشفت رانيا رأيها في حرمانية الفن: ماليش دعوة بحرام أو حلال لأن الفن ده بقاله 100 سنة سينما، ولو دخلت شتمتي فنانة يبقى ده رمي محصنات او قولتي على واحد دياثة ده كده أنت بتهينه قدام اهله.

برنامج "أوضة ضلمة" تقدمه الإعلامية إنجي هشام على شاشة قناة "هي" يوميًّا في الثامنة مساءً من السبت إلى الخميس، وتستضيف من خلاله أبرز نجوم الفن والرياضة الذين يكشفون كواليس بداياتهم وأسرارًا عن حياتهم.