بطل المصارعة محمود السباعي يكشف كواليس رحلة إصابته وحتى علاجه من كورونا.. شاهد

كشف محمود السباعي لاعب منتخب مصر للمصارعة، عن تفاصيل اصابته بـ فيروس كورونا المستجد خلال فترة تواجده في أمريكا.

وكتب محمود السباعي عبر حسابه الرسمي بموقع التواصل الاجتماعي " فيس بوك " :" اللهم الا اعتراض راضي بحكمتك يارب العباد ، انك اخترتني للاختبار والابتلاء كورونا واكتئاب وغيبوبة، كله في شهر واحد".

وأضاف : "في الاول ظهرت أعراض كورونا من ٣ أسابيع وانا كنت مفكرها برد عادي بس كان شديد جدا لاني عمري ما تعبت بالطريقه دي ولا ظهرت عليًا الأعراض دي قبل كده درجه حرارتي كانت 110f و كحه ناشفه جدا وجسمي كله في وجع مش طبيعي وصداع كان بيموتني".

وتابع: "الحمد لله اني روحت المستشفي قبل ما يحصل التكدس اللي موجود في المستشفيات هنا في امريكا، المهم عملولي اختبار وطلع إيجابي، ووقتها قولت الحمد لله علي قدرك يارب حتي لو انا خلاص هموت انا راضي بقضاءك وحكمتك عشان رحمتك وسعت كل شيء"ز

واستطرد: "عملولي تنفس صناعي واخدت الادويه اللازمه وبعدها الحاله بدأت تستقر، ووقتها طلبت منهم اني اكمل isolation في المنزل؛ لان المستشفيات بتجيبلي اكتئاب، وانا حالتي النفسيه مش كويسه من قبل ما يجيلي الڤيروس".

وأضاف: "وقعدت في البيت أسبوعين وماشي علي كل الادويه ومش بشوف حد ولا بقابل حد، وكانو اصعب أسبوعين في حياتي لاني كنت بشوف الاخبار كل يوم الناس اللي بتموت بسبب الڤيروس، ومستني الموت وكأنه بيدق بابه وشريط حياتي كله كان بيظهر قدامي لحظه بلحظه كان بيصبرني ويقويني اني عملت وبعمل خير في حياتي بيني وبين ربنا في السر قادر يشفعلي عنده ورحمته اللي وسعت كل شيء، ودعوات أمي اللي مش بتخلص في فجر كل يوم بتصحي تصليه دعواتها اللي بتنجيني وبتحميني من كل شر، اسف يا أمي اني معرفتكيش كل الفتره دي بس كان من خوفي عليكي وعلي صحتك بس انا بطمنك اني بقيت احسن الحمد لله بفضل ربنا ودعواتك ليا يا اغلي حاجه في حياتي".

واستطرد: "كان جوايا يقين ان ربنا هيشفيني لانه عمره ماخذلني كل مره كان بيحصلي حاجه وحشه في حياتي برجع وأقول شكرا يارب علي الابتلاء راضي بحكمتك واختيارك ليا للاختبار والابتلاء، شكرا لحبكم ومشاعركم النبيلة ليا ودعواتكم بظهر الغيب والناس اللي كانت بتسأل علي من غير ما يعرفو انا بمر بإيه احساسهم اني مختفي بقالي فتره وقلقهم عليا ودعواتهم ليا كانت بتقويني كتير ، الحمد لله ان ربنا نجاني من الڤيروس والفتره اللي جايه هبداء أتعالج من اكتئاب حاد، بس انا واثق في ربنا وفي رحمته ومحتاج دعواتكم كتير الفتره دي لو سمحتم

واختتم : "اخر حاجه محتاج اقولها وهيا نصيحه اقعد في بيتك ، اقعد في بيتك ، اقعد في بيتك..انك تقعد في بيتك ده بيقلل انتشار الڤيروس بطريقه كبيره جدا وفي نفس الوقت بيخلي الجهات المختصة تعرف تتعامل مع كميه الحالات اللي بتتعرض للأصابه، لان لو الحالات زادت هتكون خارج عن سيطرت المنظومه الطبيه لان ده وباء عالمي ومفيش دوله في العالم ولا كبيره ولا صغيره كانت جاهزه لوباء زي ده "