محتاجة لتفسير

أنا كنت صفحة ف قلب كتاب

وسطورى شايلة كلام ياما

وعشان صحيح الهوى غلاب

وقعت حروفى ف دوامة

شدتنى برّة كتابى قوام

وقالت لى بس كفاية علام

دى الخبرة من بطن الأيام

اقرى السنين تبقى علامه

وطاوعتها وطلعت أجري

برّه الكتاب من غير تفكير

وأتارى لسه ياناس بدرى

على صفحة محتاجة لتفسير

فكرت لما أطلع برّه

ح ألقى الحياة ورد وخضرة

باشت حروفى من المطرة

والسكة مليانة ندامة

لا عرفت أرجع لكتابي

ولا عارفة أمشى أزاى ومنين

ياجهل قلبى وياعذابى

سبت الكتاب روحت لسكاكين

الكذب أصبح قسط وكاش

والغدر متوزع ببلاش

كل الحروف ملفوفة بشاش

واتمنى من ربّى سلامة

د أنا كنت صفحة فى قلب كتاب

وسطورى شايلة كلام ياما

وعشان صحيح الهوى غلاب

وقعت حروفى ف دوامة